Сугыш чоры балаларының, тыл ветераннарының   юбилей бәйрәмнәрен котлап билгеләп үтү  матур күркәм гадәткә әйләнде. Авылыбызның хөрмәтле кешеләреннән берсе - Герой Ана -  Хуснуллина Накия Миннегалеевнага  шушы көннәрдә 85 яшь тулды. Сугыштан соңгы авыр елларда ун баланы тәрбияләү һәм кеше итү Мөнир абый белән Накия апага һич җиңел булмагандыр. Шушы авыр хезмәтнең нәтиҗәсе буларак,  ул  бүген - балаларының кадерле әниләре,  оныклары һәм оныкчыкларының сөйкемле әбиләре. Кызганычка каршы,  Мөнир абый  күптән гүр иясе инде. Ләкин шулай булса да,  нигез таркалмады,  балалары һәм оныклары кайткан төшкә ишекләре ачык.

 Кичә мәктәп укучылары белән бергәләп,  Накия апаны юбилей белән котладык һәм кечкенә концерт  номерлары күрсәттек. Олы күңелле апа үзенең чиксез рәхмәтләрен белдереп укучыларга, мәктәп администрациясенә изге теләкләрен  җиткерде. Без дә үз чиратыбызда,  аны  юбилее  белән котлап, бар гомеренә исәнлек –саулык, күңел тынычлыгы, балалар бәхете теләп калабыз. Картлык көннәрендә аяз көннәре  күп булып һәрдаим күңелен шатландырып торсын иде.