Чүпрәле районы илебезгә  күп батырлар  биргән төбәк . Районыбыз халкы үзенең батырлары белән чиксез горурлана, аларны һәрвакыт үрнәк итеп куя.  Без дә үзебездә үткәрелгән чараларда аларның исемнәрен яңгыратырга , эш- гамәлләрен үрнәк итеп күрсәтергә тырышабыз. Дәр есләрдә, сыйныф сәгатьләрендә алар турында презентацияләр әзерләп, яшь буынга  батырлык төшенчәсен күңелләренә сеңдерергә телибез. 4 нче октябрьдә   районыбызның Хезмәт Герое  Әхмәтгәрәй  Шакирҗан улы Әбдриевның тууына 93 ел булды. Ул 1943 нче елда сугыш кырыннан яраланып кайткач, гади колхозчы булып эшли башлый. Аңа кадәр  хисапчы булып эшләгән була. Уңган, эшчән, зур оештыру сәләтенә ия булган егетне тиз арада күреп алалар һәм  җитәкче органнарга куялар. Хезмәт биографиясе 1956 нчы елдан башлап 1988 нче елга кадәр,  Чүпрәле районының ,,XXII партсъезд исемендәге”  колхоз рәисе буларак, тарих битләренә кереп кала.Бүген мәктәптә аның хөрмәтенә “Җир улларына хөрмәт белән карыйк!” дип исемләнгән китап укучылар конференциясе  үткәрелде, ә сыйныф сәгатьләрендә якташыбызның туган ягы Иске Шәйморзага телдән сәяхәт кылып, аның тормыш һәм хезмәт юлын кабат искә төшердек. Укучыларның  сорауларына  җавап биреп, тыныч тормышта да зур батырлыкларга ирешергә мөмкин икәнлегенә төшендердек. Алар бу чарадан соң   “Нәрсә ул батырлык?”  дигән сорауга дөрес җавап табарлар дигән фикердә калдык. Киләчәктә дә батырларыбызны онытмабыз, аларга лаеклы алмаш әзерләргә тырышырбыз.