Нумаях пулмасть П.В.Дементьев ячӗпе хисепленекен Алешкин Саплӑкри пӗтӗмӗшле пӗлӳ паракан вӑтам шкула савӑнӑҫлӑ хыпар килсе ҫитрӗ. Иккӗмӗш класра вӗренекен шӑпӑрлансем валли вӗр-ҫӗнӗ партӑсемпе тенкелсем илсе килнӗ. Ҫак сӑваплӑ ӗҫ ялти ырӑ кӑмӑллӑ предпринимательсем тӑрӑшнипе йӗркеленнӗ. Хальхи саманапа килӗшӳллӗн тӑвӑннӑ илемлӗ сӗтел-пукансем пурӗ 46 пине ларнӑ.
Ҫавна май иккӗмӗш классене вӗрентекен Зинаида Федоровна Иванова хаклӑ парне тӑвакан ыр кӑмӑлҫӑсене чун-чӗререн тав тунине пӗлтерчӗ."Пирӗншӗн ку питӗ ырӑ та кӑмӑллӑ кӗтменлӗх пулчӗ. Ачасем те, ашшӗпе амӑшӗсем те питӗ хӗпӗртерӗҫ. Сӗтел-пукансем ларма та, кӗнеке-тетрадь хума та, урока хатӗрленме те питӗ меллӗ", - терӗ савӑнӑҫне пытараймасӑр Зинаида Федоровна.
Пулӑшу кӳрекенсене ашшӗ-амӑшӗсен ятӗнчен Оксана Григорьева ӑшшӑн саламларӗ, Тав сӑмахӗ каларӗ. Малашне те ӗҫре ҫитӗнӳсем тума ырлӑх-сывлӑх, телей те ӑнӑҫу сунчӗ.
"Паракан алӑ нихӑҫан та иксӗлмест", - тесе ахальтен каламаҫҫӗ ҫав. Предпринимательсем тӑрӑшнипех ял сӑн-пичӗ ҫулсерен илемленсе, пуянланса кӑна пырать. Ял-йышсен, хӑнасен туса панӑ хӑтлӑха упрама, ыр кӑмӑлҫӑсене Тав тума вӗренесси ҫеҫ юлать.