Икенче сентябрь көнне Югары Кәминкә мәктәбе укучылары, укытучылары һәм ата-аналар Белем бәйрәмен һәм яңартылган мәктәп бинасын ачылу көнен билгеләп үттеләр.

Бу көнне Белем бәйрәме белән котларга район башлыгы Наил Шамилевич, мәгариф бүлеге начальнигы  Хамәткамил Шамилевич, методист Разыя Касыймовна, Татарстан Республикасы Мәгариф  һәм фән министрлыгы вәкиле Гүзәл Кәбирова, Югары Кәминкә авылы  җирлеге башлыгы Кирам Минвәлиевич, ЮХИДИ начальнигы  Самат Нурахметович һ.б.лар килгән иде.

Бәйрәм яңартылган мәктәпнең ачылу тантанасыннан башланды. Яңа уку елына багышланган чара  да  мәктәпнең киң һәм якты залында үтте. Бәйрәмнең иң матур мизгеле беренче сыйныф укучыларын мәктәпкә кабул итү һәм аларның һәркайсына портфельләр тапшыру булгандыр, мөгаен.
Җыелучылар алдында иң элек мәктәп директоры Гөлшат Габдрахмановна чыгыш ясады. Ул Югары Кәминкә  мәктәбенең бай тарихлы булуын, бик күп белемле шәхесләр тәрбияләп чыгаруын  билгеләп үтте. Бу мәктәптән бик күп белгечләр, җитәкчеләр чыккан. Мәсәлән, мәктәбебезнең бүгенгесе һәм киләчәге белән кызыксынып, ярдәм итеп торучы Искәндәр Мингатинович - шуларның берсе. Директор шулай ук  кыска гына вакыт эчендә сыйфатлы эш башкарган төзүчеләргә, мәктәпнең педагогик һәм техник коллективына, аеруча “Татнефть” ачык акционерлык оешмасы генераль директоры Шәфәгать Фәхразый улына, “Нурлатнефть” җитәкчесе   Илгиз Мисбаховичка мәктәпне  уку елына әзерләүдә ярдәм иткәннәре өчен зур рәхмәтен белдерде.  Укучыларны, ата-аналарны, педколлективны бәйрәм белән барлык килгән кунаклар  да тәбрик итте, бүләк белән куандыручылар да аз булмады. Мәсәлән, район башлыгы Наил Шамил улы бик матур картиналар бирде,  Керкәле авылы мәчете вәкиле буларак Шәүкәт абый Хайруллин  теннис өстәле белән шатландырды...