Бу кичәгә әзерлек күптән башланган иде инде: тарих укытучысы Гөлнирә Нагимуллина җитәкчелегендә укучылар Яңа Чәчкап  авыл җирлегеннән  Әфган сугышында катнашкан  егетләр турында мәгълумат җыйдылар, презентация әзерләделәр, укытучылары белән бәйрәм программасын төзеделәр. Гаиләләре белән хат алыштылар. Очрашуга Тәүгелде авылы егете Бикчәнтәев Мөслим, Гатиятуллин Сәүбан, Әхмәт авылыннан Сафин Фарук  бик теләп, ашкынып , туган мәктәпләрен  сагынып кайттылар. Үзләренең чыгышларында  белемле, тәрбияле физик яктан нык  һәм  Ватан кушканны үтәрлек  егетләр булып үсәргә кирәклеген  ассызыклап билгеләп үттеләр. Укучыларның чыгышларын диккать белән тыңлап , презентацияләрдәге  фотолар аша үзләренең яшьлек елларына  кире кайтып , авыр мизгелләрне күңелләре аша уздырдылар .  Кичәне татар теле укытучысы Фәридә Рәхимова  бик җылы , ягымлы итеп алып барды. Чыгышларны залдагылар тын да алмый тыңладылар. Зиганшин Алмаз, Бикмуллина Ландыш, Садриева Әдилә,Кабиров Радикларның сагышлы- моңлы җырлары кичәнең эчтәлеген  тагын да баетты.