Үз халкыңның тарихын, мәдәниятен, гореф-гадәтләрен белүгә зур игътибар бирелә. Һәр халыкның үз милли каһарманнары бар. Аларның исеме халык күңелендә мәңге саклана. Шуларның берсе - Советлар Союзы герое, күренекле шагыйрь Муса Җәлил. Быел аның тууына 118 ел булды. Муса Җәлилнең шигъри иҗаты батырлыкның, Ватанга тугры булуның, чыдамлыкның гимны булып яңгырый. Герой шагыйрьнең юбилеен Татарстанда гына түгел, хәтта бөтен Россиядә билгеләп үтәләр. Без дә, Буа шәһәре 2нче номерлы лицейның 6 нчы сыйныф укучылары белән, Муса Җәлилнең истәлегенә багышлап "Өзелгән җыр" исемле кичә үткәрдек.

Бу чараның максатлары: Муса Җәлилнең тормыш юлы, иҗаты, аның сугыштагы батырлыгы, геройларча һәлак булуы, "Моабит дәфтәрләре белән таныштыру; балаларны Җәлилнең шигырьләрен сәнгатьле итеп укырга өйрәтү; балаларда туган илгә, Ватанга, үз халкыңа тугры булу, ярату хисләре тәрбияләү.

Кичә барышында укучылар Муса Җәлил турында чыгыш тыңладылар, слайд-шоу карадылар, аның шигырьләрен укыдылар.