Татар шигъриятендә Габдулла Тукай — иң якты йолдыз. Ул калдырган иҗат мирасы һәм рухи яктылык — безнең олы мактанычыбыз һәм горурлыгыбыз. Тукайның исеме татар мәдәниятенең үткәне, бүгенгесе һәм киләчәге белән мәңгегә бәйле.

Бүген без мәктәбебездә бөек шагыйребезнең туган көнен зурлап билгеләп үттек. «Тукай әкиятләренә сәяхәт» дип исемләнгән бәйрәм кичәсе һәркемнең күңелендә якты истәлекләр калдырды.

???? Кичәдән якты мизгелләр:

4-в сыйныфы укучылары Тукай абыебызның тылсымлы әкиятләрен сәхнәләштереп, чын артистлык осталыгын күрсәттеләр.

Шагыйрьнең үлемсез шигырьләрен Әхмәтов Самир (1-в), Вәлиева Нәфисә, Сафина Камилә (3 сыйныф) һәм Хәйбуллова Ралинә (6-а) дулкынландыргыч итеп сөйләделәр.

5 сыйныф укучылары «Эш беткәч уйнарга ярый» әкиятен сәхнәләштереп, тамашачыларга үтемле киңәшләрен җиткерделәр.

Бәйрәм бердәмлек символы булган, татар халкының гимнына әверелгән «Туган тел» җыры белән тәмамланды.

Без Тукайның үз милләте, теле һәм мәгърифәте өчен җан атып яшәгән милли шагыйрь икәнлеген һәрдаим истә тотарга тиешбез. Аның иҗаты — дөнья киңлекләренә юл салучы рухи маягыбыз! ????????