21нче февральдә дөньякүләм Туган тел көне билгеләп үтелә. ЮНЕСКО тарафыннан игълан ителгән әлеге бәйрәм дөньядагы телләрне саклау, аларны киләчәк буынга исән-имин җиткерү максатыннан оешкан. Бүгенге көндә галимнәр Җир шарында 7 меңнән артык тел булуын әйтәләр. Һичшиксез, алар арасында миллиардлаган аралашучы һәм шул ук вакытта бер дистә кеше сөйләшә торган телләр дә бар. Хәзерге заманда күпчелегебез ким дигәндә 2-3 телне  камил белә. Туган тел ул бер генә була. Шуңа күрә һәр милләт кешесе үз телен яратырга  һәм башка милләтләрнең теленә хөрмәт белән карарга тиеш.
   Без үзебезнең лицейда да әлеге бәйрәмне билгеләп үттек. Укучылар төрле телләрдә шигырьләр сөйләделәр, җырлар җырладылар. Шулай ук татар, урыс, чуваш халык биюләрен башкардылар. Кичә  татар халкының гимны булган "Туган тел " җыры белән тәмамланды. Мондый чаралар телебезне саклау, ярату һәм хөрмәт итү мөһимлеген  искә төшерү максатында кирәк.
  Туган  телләребезне саклыйк, яклыйк!