Музей материаллары - балалар өчен үзе бер хәзинә. Музейның беренче бүлегендә төп урынны ерак әби-бабаларыбызның көнкүреш җиһазлары, кулдан чигелгән тукымалар, киемнәр, бизәнү әйберләре, диспеләр алып торса, икенче бүлегендә Советлар Союзы чоры экспонатлары җыелган. Музейларда халыкның тарихы, рухи мирасы саклана.

Балалар музейдагы эш коралларын, милли киемнәрне, өй җиһазларын, бизәнү-ясану, көнкүреш һ.б. әйберләрне үз күзләре белән күрәләр һәм, куллары белән тотып карап, хәтерләрендә калдыралар, бабаларыбызның, әбиләребезнең тырышлыгына, осталыгына сокланалар. Мондый эш башкару укучыларда патриотлык хисе тәрбияли, туган як тарихы, халкы белән кызыксыну уята.

Халкыбызның рухи мирасын, аның тарихын өйрәнүдә балаларга чын мәгънәсендә әхлак Һәм патриотик тәрбиясе бирүдә музей эшчәнлеге әйтеп бетергесез әһәмияткә ия.

Музейлар ул -  хәтер почмагы. Балалар тарих белән кызыксына икән, димәк, музейларның  киләчәге бар!