Карадуган мәктәбендә 24 мартта «Мәктәп гүзәле – 2011» бәйгесе үткәрелде. Бу кичә мәктәбебезнең гүзәл һәм уңган кызларына багышланды. Бәйгедә катнашу җиңел түгел иде, шулай да катнашучыларның саны 13 кә җитте. Гүзәл затларыбыз зур әзерлек белән килеп,  «Таныш булыйк», «Кием –күңел көзгесе», «Ак алъяпкыч билләрдә», «Сихри күлмәк», «Сорау бездән, җавап сездән» кебек ярышларда үз көчләрен сынады. Гүзәл зат дигәч, тышкы матурлыкны гына күз алдына китерәбез. Ләкин кеше үзенең тышкы матурлыгы, эчке олы рухи байлыгы, әдәплелеге һәм тыйнаклыгы белән генә чын мәгънәсендә гүзәллеккә ия була.