Балтач төбәгендә–чын мәгънәсендә зур бәйрәм-шигырь бәйрәме, туган тел бәйрәме, хезмәт һәм дуслык бәйрәмен берләштергән бөек Тукаебыз бәйрәме узды. Габдулла Тукай! Йөзмеңнәрчә кешеләр зур горурлык һәм мәхәббәт белән телгә алалар бу исемне. Тукай ул халкыбызның йөзен, рухи асылын чагылдыра. Даһилар гомере гасырлар белән исәпләнә. Халкыбызның бөек шагыйре Габдулла Тукайның да дөньяга килүенә бу ел - 139 ел! Шул уңайдан Балтач Мәдәният үзәгендә Габдулла Тукайның 139 еллыгы, Бөек Ватан сугышы тәмамлануга 80 ел булу уңаеннан уздырылган, «Халкым горурлыгы син, Тукай!» = «Наш долг – жизнь во имя Родины!» - дип аталган район нәфис сүз осталары бәйгесе җиңүчеләре бүләкләнде. Тукай көннәре уӊаеннан районыбызга килгән язучылар: Дания Нәгыйм, Рәдиф Гаташ, Рабит Батулла, Марат Әмирханов, Фоат Галимуллин, Гөлзада Бәйрәмова, Рифә Рахман, Лениза Валиева, Рәҗәп Бәдретдинов, Тәнзилә Галимуллина, Айсылу Галиева бәйрәмнең кунаклары булды.