Балтач гимназиясе ишекләре бүген шат елмаю белән ачылды. Бүтәнчә була да алмый, чөнки бүген яңа уку елына аяк басабыз, бүгеннән җиң сызганып, тырышып укый башлыйбыз. Әнә, тантана да ничек эчтәлекле, мавыктыргыч бара. Гимназия укучыларын котларга Балтач районы башлыгы Рамил Нотфуллин да килде, ул балаларга изге теләкләрен җиткереп, ил-көнгә файдалы шәхесләр үсүен теләде. Шулай ук Җөмһүриятебезнең Сәламәтлек саклау министры урынбасары Фәридә Яркаева да районыбыз баш табибы Газинур Дәүлиев белән килеп, гимназиябезнең шатлыклы көне белән уртаклаштылар. Беренче сыйныфка керүче балалар өч телдә дә шигырь сөйләп, күмәк җыр-бию белән традицияне яңартты. Унберенче сыйныфлар беренче сыйныфларга тылсымлы самолетлар бүләк итте. Һәр самолет эчендә нәни укучыга изге теләк язылган. Айгиз Миңнемуллин яраткан укучыларына шулай ук изге теләкләрен җиткерде. «Иман нуры» мәчете имамы Рамил хәзрәт тә котлауларын ирештереп, бүләкләр өләште. Татарстан Рәисе исеменнән дә беренчеләргә бүләкләр бирелде. Тәүге кыңгырау чыңлады. Күкләр аяз, дөньялар тыныч булсын, барыбызга да уку елын уңышлы үтәргә язсын.