Казан шәһәренеӊ Яшь тамашачылар  театрында республикакүләм «Сәйяр» театр бәйгесендә җиӊүчеләрне котладылар. 2023нче елныӊ март аенда Татарстан Мәгариф һәм фән министрлыгы  республикакүләм балалар һәм яшүсмерләр театр фестиваль бәйгесенә старт бирде. Ул мәктәп, район, зона һәм республика турларын үз эченә алып, 2023нче елныӊ мартыннан декабрь аена кадәр дәвам итте. Башка еллардан аермалы буларак, бәйгегә удмурт, мари телендәге спектакльләр белән дә  катнашу мөмкинлеге кертелде. Республикада узган бүләкләү тантанасына 5 театр коллективы чакырылды. Бәйгедә Балтач гимназиясенеӊ театр коллективы (җитәкчеләре: А.И. Хакимҗанова, С.А. Егорова) 2нче урынны яулады. Аларга Мәгариф һәм фән министрлыгыныӊ дипломнары, Татарстан Республикасы Рәисе каршындагы татар телен һәм Татарстан Республикасында яшәүче халыклар вәкилләренеӊ туган телләрен саклау, үстерү мәсьәләләре комиссиясенеӊ кыйммәтле бүләкләре тапшырылды. Берничә этапны уӊышлы үтеп, бәйгедә җиӊүгә ирешкән театр коллективын һәм җитәкчеләрен котлыйбыз, аларга иҗатларында уӊышлар телибез!