21 нче февраль - һәр милләт, һәр халык өчен бәйрәм көн – Халыкара туган тел көне. Һәркем өчен дөньядагы иң кадерлесе – беренче сөйләшә башлаган ана теле.

   Халыкара туган тел көнендә мәктәбебезнең татар теле һәм әдәбияты укытучылары ачык дәресләр күрсәттеләр.  Ә 6 нчы А сыйныфы укучылары сыйныф җитәкчесе Г. Н. Фазлыева белән берлектә  татар исемнәренең килеп чыгышы, мәгънәләре турында “Исемең матур, кемнәр куйган?” дигән эчтәлекле кичә әзерләделәр.

   Татар халкы элек - электән исем кушуга зур җаваплылык белән караган. Яңа туган сабыйга кушу өчен исем эзләгәндә, ул исемнең җиңел әйтелешле, яхшы мәгънәле һәм аһәңле булырга тиешлеген истә тоткан. Балага исем кушу – бик җаваплы, зур һәм мөһим выкыйга. Кичәдә исем кушу йоласын Яңа Юл мәчетеннән Илнур хәзрәт күрсәтте. Кичәгә кунак булып килгән әни-әбиләрнең күзләрендә шатлык яшьләре җемелдәде. Балаларының мәгънәле исем йөртүләренә, матур итеп татарча аралашуларына алар бик канәгать калдылар.