21нче февраль — халыкара туган телләр көне буларак билгеләп үтелә. Һәр халыкның теле үзенчәлекле, күп телләр белү дөньяга карашны киңәйтә, төрле милләт халкының мәдәниятен тирәнрәк белергә ярдәм итә. Ләкин һәркемнең дә туган теле бер генә. Шуңа күрә һәр милләт кешесе үз телен яратырга һәм башка милләтләрнең теленә хөрмәт белән карарга тиеш. Әлеге бәйрәм уңаеннан Азнакай шәһәренең 2 нче урта мәктәбендә “Туган телем- назлы гөлем” исемле семинар үткәрелде. Туган тел һәм әдәбияты укытучылары Фәридә Фәрит кызы, Резеда Илкам кызы, Светлана Сәгыйдулла кызы үзләренең эш тәҗрибәләре белән уртаклаштылар, Гамбария Мөдәррис кызы мастер – класс күрсәтте..Яраткан язучыбыз Фәнис Яруллинның шундый сүзләре бар: «Тел - халык күңеленең кыңгыравы.  Ә кыңгырау кагылмасаң чыңламый». Кыңгырау гел чыңлап торсын өчен, тел югалмасын өчен үз телеңдә сөйләшергә кирәк. Мондый чаралар телебезне саклау, ярату һәм хөрмәт итү мөһимлеген искә төшерү максатында кирәк.