Азнакайның 9нчы номерлы мәктәбе гөрләп тора. “Ачыш” фәнни-гамәли конференция тугызынчы тапкыр үткәрелде. Елдан-ел районда оештырылучы әлеге чарага укучылар күбрәк катнаша. Материалларның эчтәлеге бай булу, укучыларның яшьтәшләре алдында чыгыш ясарга омтылуы да куанычлы. 8 секциядә 136 укучы тәкъдим иткән эзләнү һәм проект эшләрен Мәгариф идарәсе методистлары, югары квалификацияле укытучылар  бәяләделәр. Жюри әгъзалары арасында “Ачыш-2016” фәнни-гамәли конференция җиңүчесе, бүгенге көндә Казан федераль университеты Халыкара мөнәсәбәтләр институтының тарих факультеты студенты Хасанова Диана Равилевна да бар иде. Конференция эшендә Мәгариф идарәсе җитәкчесе А.М.Рахманов, җитәкче урынбасары Л.М.Ахмадишана катнаштылар һәм чыгыш ясадылар.