Олы тормыш юлы үтеп, камил акылны, күңел көрлеген саклап калу зур бәхеттер. Безгә нәкъ менә шундый кеше белән очрашырга туры килде.  Ветеран 4 октябрь  көнне үзенең  99 яшен билгеләп узган. Авыр балачагы, сугышта үткән яшьлек еллары, үзенең бөтен эш дәверендә иҗтимагый тормышта актив катнашуы, тырышлыгы, белемгә  омтылуы өчен аңа озын гомер, искитмәле хәтер бирелгәндер, мөгаен. Ул - Азнакай шәһәренең Почетлы Гражданины. “Сугышчан Кызыл байрак”, I, II дәрәҗә Ватан сугышы орденнары, “Сугышчан хезмәт”, “Хезмәткә дан” һәм юбилей медальләре белән бүләкләнгән.

           Ветеран Миргасим  Әбелкасым улы “Гомер аккан су кебек үтә. Әнә шулай гомер юлым гел хезмәт белән үтте, кайгылар булды, шатлыгы да... Актив, тырыш,  ярдәмчел, миһербанлы, һәрнәрсәгә әзер  булып үсегез!” –дип белдерде.  Очрашу мизгелләрендә  түгәрәк өстәл артында ветеран белән чәй эчүләр, фотога төшүләр, очрашу истәлеген видеотасмага язулар күңелләрдә онытылмас хатирәләр калдырды.