16нчы февральдән 21нче февральгә кадәр гимназиябездә Халыкара туган тел көненә багышланган күптөрле чаралар уздырылды. Һәрбер класста халыкара туган тел көненә багышлап тәрбия сәгатьләре үтте. Укучылар тарафыннан инглиз, татар, рус телләрендә стена газеталары чыгарылды. 7-8нче класс укучылары катнашында “Тел-халыкның хәзинәсе” дип аталган түгәрәк өстәл артында узган сөйләшү шулай ук укучылар күңелендә тирән эз калдырды. Укучылар татар теле, аның сафлыгы, аны саклау һәм куллану турында булган фикерләре белән уртаклаштылар. Китапханәче Сөмбел Атласовна аларны билгеле шәхесләрнең тел турында әйткән канатлы сүзләре белән дә таныштырды. Сөйләшү бик нәтиҗәле һәм файдалы булды.

5 Б сыйныфында татар теле һәм әдәбияты укытучысы Р.Х. Семенова тарафыннан әзерләнгән “Тел рухи байлыгыбыз” исемле ачык дәрес тә телнең бөтен халык казанышы, меңнәрчә, миллионнарча кешенең күп гасырлык иҗат җимеше икәнлеген дәлилләде. Дәрестә укучылар тел турында булган мәкальләрне, шигырьләрне, җырларны искә алдылар. Укучылар арасында иң аерылып торганнары да булды, болар түбәндәгеләр: Адель, Диана, Зарина, Миләүшә, Ләйсән, Алсу...