Азнакай шәһәре гимназиясе 4 А класс укучылары 25 нче апрель көнне Бөек Җиңүгә карата гимназиядә җыештыручы булып эшләүче Хакимова Әминә апалары белән очрашу – класс сәгате үткәрделәр. Әминә апа балаларга үзенең әнисе – сугыш ветераны Хөршисара апа Кашафетдинова турында сөйләде. Хөршисара апа Тымытык авылыннан япь-яшь кыз булып сугышка китә.Ул санитарка хезмәтен башкара. Сугышны Кёнигсберг шәһәрендә тәмамлый, ләкин өенә бары 1946 нчы елда гына кайта. 1275 сутка дәвам итә аның авыр хезмәте. Кайткач, тормышка чыгып, бер кыз, бер ул табып үстерә. Үзе “Комунна” (хәзерге “Маяк”) район газетасында хезмәт юлы үтә.

Әминә апаларының эчтәлекле хикәясен укучылар йотлыгып тыңладылар, сугыш темасына шигырьләр, җырлар башкардылар. Эчтәлекле очрашуның азагында классташлары Якупова Диләрәнең әбисе – шулай ук сугыш ветераны Якупова мөршидә апалары турында әзерләгән презентациясен карадылар һәм класс җитәкчесе Гарипова Рузалия Дамир кызы әзерләгән викторина сорауларына җаваплар бирделәр. Очрашу балалар өчен кызыклы һәм файдалы үтте.