7 декабрь көнне мәктәбебездә “Йолдызлы кичә” – балалар шагыйрәсе, Язучылар берлегенең А. Алиш исемендәге бүләге иясе, “Сабантуй” газетасының әдәби бүлек җитәкчесе Йолдыз Шәрәпова белән очрашу булып узды. Чарада I-VII сыйныф укучылары катнашты. Балалар әлеге бәйрәмдә шагыйрәгә үзләрен кызыксындырган сораулар бирделәр, аның шигырьләрен матур итеп сөйләп күрсәттеләр. Йолдыз Шәрәпова укучыларның сорауларына гына җавап биреп калмыйча, үз чиратында аларны иҗаты белән, басылган китаплары белән якыннанрак таныштырды, шаян, тормышчан шигырьләре аша үтемле киңәшләрен бирде, кызыклы хәтирәләре, шигырь язу серләре белән бүлеште. Укучыларыбызны күренекле шәхесләр белән якыннан таныштырып, күзгә-күз аралаштырып, үз туган телебез, әдәбиятыбыз белән тагын да якынайту максатыннан оештырылган бу очрашу-кичә балалар күңелендә матур, җылы тәэсирләр калдырды.