15 февраль көнне рус гаскәрләрен Әфганстан җиреннән чыгарып бетерүгә 34 ел тулды. Әфганстан... Күпме кешеләрнең кояшлы көннәрен, тыныч төннәрен урлаган күпме кешеләргә кайгы китергән. 9 ел 51 көн буена барган бу сугыш. Әфган сугышы безнең халык өчен 15 меңгә якын кургаш табут, 50 мең яралы, 312 мең хәбәрсез югалган солдат рәвешендә әйләнеп кайтты. Исән кайтканнар мәңге төзәлмәс күңел җәрәхәте алды. Татарстан Республикасы сугышта менә дигән 257 егетен югалтты. Алар арасында авылдашыбыз Сафиуллин Илдар Хәйдәр улы  да бар. Батырлыклар күрсәтеп һәлак булган егетебез чаңгычы булган. Үзе мәрхәмәтле, гел ярдәмгә ашыккан. Илдар Сафиуллин истәлегенә ел да Олы Мәңгәр төп гомуми белем мәктәбендә чаңгы ярышы үткәрелә. Әлеге чарага аның якташлары - әфганчы егетләр дә чакырыла. Быел да әлеге традициягә тугры калдык. 18 февраль көнне батыр егетләр мәктәбебезгә кунакка килделәр, герой турында булган истәлекләрне яңарттылар.