14 октябрь - Тыюлык хезмәткәрләре көне. Шул уңайдан, мәктәбебез укучылары Татарстан Республикасының Биологик ресурслар буенча дәүләт комитеты "Ашыт" дәүләт заказнигы белгече Абдрахманова Гөлнара Ильяс кызы һәм Әхмәтҗанов Рәшит Зиннур улы, Татарстан Республикасы экология һәм табигый ресурслар министрлыгының Төньяк территориаль идарәсе белгече Шәймуллина Алия Ринат кызы белән очраштылар. "Хайваннар дөньясында" исемле экологик дәрескә мәктәпнең 7,8 нче сыйныф укучылары чакырылды. Чараның максаты - укучыларны хайваннар дөньясының күптөрлелеге белән таныштыру, килеп туган экологик проблемаларны чишү юлларын эзләү, балаларда әйләнә-тирәлеккә һәм анда яшәүчеләргә сак караш тәрбияләү. Белгечләрнең эчтәлекле чыгышы, мавыктыргыч уеннар, уйларга һәм нәтиҗәләр ясарга мәҗбүр иткән сораулар белән үрелеп барган очрашу укучыларыбыз өчен бик файдалы булды.