Барыбыз өчен дә иң зур бәйрәмнәрнең берсе – Бөек Җиңү көне килеп җитте. Быел бу олы дата 79 еллыгын билгеләп үтә. Җиңү зур корбаннар аша килгән. 4 ел сугыш дәвамында халкыбыз тудырган зур батырлыклар һәм кичергән зур газаплар мәңге онытылырлык түгел. Каһарманнар даны мәңгелек! Бер кайтмасак, бер кайтырбыз дип китсәләр дә, күпме авылдашларыбыз туган туфрагын күрү бәхетенә ирешә алмаган. Алар еракта мәңгелек йокыга талганнар. Туган җирләре өчен башларын салган бу батырларны онытырга безнең хакыбыз юк. Алар безнең белән, безнең арада. Авылыбыз уртасында алар хөрмәтенә салынган һәйкәл — моның ачык мисалы. Безнең якты киләчәгебез, сабыйларның тыныч йокысы хакына башларын салган авылдашларыбызны зур хөрмәт белән искә алып, һәйкәлгә, бер минут тынлык белән баш иеп, венок һәм чәчәкләр куйдылар.