Бүген Курса Почмак урта мәктәбендә укучыларга  һөнәри юнәлеш бирү максатыннан очрашу үтте. Арча аграр-сәнәгать һөнәр көллияте җитәкчесе Дәүләтбаев Зөлфәт Миннефәр улы көллият турында, кабул итү тәртипләре, алырга мөмкин булган белгечлекләр хакында җентекләп сөйләде. "Ак барс" җәмгыяте директоры Абдуллин Ленар Илсур улы укучыларны авыл хуҗалыгы ширкәтенең бүгенге торышы, эш шартлары белән таныштырды, егет-кызларны туган җирләрендә хезмәт итәргә чакырды. Мәшгульлек үзәгеннән килгән белгеч һөнәри юнәлеш буенча анкета уздырды, укучыларга киңәшләрен бирде. Әлеге очрашу-сөйләшү укучылар өчен файдалы булды.