Һәр милләт кешесенең үз туган теле бар. Ул беренче сүзен шушы телдә әйтә. Әнисе һәм әтисе аңа шул телдә эндәшәләр. Әнисе ана телендә бишек җыры җырлый. Дәү әнисе әкиятләр сөйли. Ата - ана теле җанга бик якын. Кеше дөньяны туган теле аша аңлый башлый. Иң матур сүзләрне шушы телдә ишетә һәм әйтә. Кеше ана телендә халыкка хезмәт итә. Туган телеңне өйрәнү, аның матурлыгын тою үзе бер бәхет бит! Бөек шагыйрьләребез Габдулла Тукай, Муса Җәлил сөйләшкән, иҗат иткән телебезне онытмыйк, яратыйк!