Музей – тәрбия учагы. Халыкның, яшь буынның рухи байлыгын саклауда музейларның әһәмияте бик зур.  Музей эшчәнлегенең максаты бер, ул да булса, халкыбызның бай тарихын, мәдәниятен, гореф-гадәтләрен, йолаларын өйрәнү аша укучыларны рухи яктан бай, иҗади сәләтле, югары мәдәниятле камил шәхес итеп тәрбияләү. 27 нче сентябрь көнне башлангыч сыйныф укучылары мәктәп музеенда кунакта булдылар. Музейда укучылар мәктәп турында, авыл турында, аның кешеләре турында тупланган күп материаллар белән таныштылар, авылыбызның милли ядкарьләрен күрделәр, авыл тарихы белән таныштылар. Укучылар музейдагы сугыш һәм эш коралларын, милли киемнәрне, өй җиһазларын, бизәнү-ясану, көнкүреш һ.б. әйберләрне үз күзләре белән күрделәр, куллары белән тотып карап, хәтерләрендә калдырдылар, бабаларыбызның, әбиләребезнең тырышлыгына, осталыгына сокландылар. Ватанпәрвәрлек  тәрбияләүдә, халкыбызның рухи мирасын, аның тарихын өйрәнүдә балаларга чын мәгънәсендә әхлак тәрбиясе бирүдә туган як музееның әһәмияте әйтеп бетергесез.