Җырлар – халык иҗатының иң таралган, бай өлеше. Җыр  - җаныбызны сафландыручы, өметләрне ныгытучы, рухи көчебезне баета торган илаһи бер көч. Без төрле конкурс-бәйгеләр аша булса да рухи мирасыбызны саклап калырга тиешбез. Моң ул безнең күңелебездә. Илһам Шакиров, Хәйдәр Бигичев, Рафаэль Ильясов, Әлфия Авзалова, Флюра Сөләйманова һәм башка бик күп легендар, даһи җырчыларыбыз һәрвакыт моңга тугры калып, гореф-гадәтләргә таянып иҗат иткәннәр һәм халкыбызның гасырлар буена җыелган милли хәзинәсен безнең буынга кадәр китереп җиткерә алганнар. Без дә үз чиратыбызда кадерле, хөрмәтле мирасыбызны киләчәк буынга түкми-чәчми җиткерергә тиешбез. Бу безнең изге бурыч! Гасырлар белән безне тоташтырган милли моң хәзинәбезне  үзебез белем һәм тәрбия биргән балалар башкаруында ишетү зур бәхет минемчә,  чын бәйрәм ! Без  милләтебез горурлыгы булган  халкыбыз җырларының киләчәге булырмы, моң чылбыры  өзелмәсме, еракларга, киләчәк буыннарга барып җитәрме дигән сорауга да җавап таптык.  «Татар халык җырлары – милләтебезнең моңлы хәзинәсе» дип исемләнгән - татар халык җырларына конкурс игълан ителгәч,  80 нэн артык җырчы үзенең җырларын видеоязмага яздырып җибәргән. "Татар халык җырлары - милләтебезнең моңлы хәзинәсе" районкүләм җыр бәйгесендә Сеҗе төп гомуми белем мәктәбе укучысы Шакирова Аделина 2 нче урын алды.