Район мәдәният йортында укытучыларның һөнәри бәйрәменә багышланган тантаналы кичә булды. Анда Арча муниципаль районы җитәкчеләре, ветеран укытучылар, бүгенгесе көндә яшь буынга белем һәм  тәрбия бирү өлкәсендә армый-талмый хезмәт куючы педагоглар катнашты. Бәйрәм җыр, музыка, котлаулар белән үрелеп барды. Намуслы хезмәт иткән педагоглар төрле дәрәҗәдәге Мактау грамоталары, күкрәк билгеләре, Рәхмәт хатлары белән бүләкләнде. Мәктәбебезнең туган (татар) теле һәм әдәбияты укытучысы Нәгыймова Равилә Рәфкать кызын да бүләкләнүчеләр арасында булуы белән  котлыйбыз. Ул Татарстан Республикасы мәгариф һәм фән министрлыгының “Телләрне, мәдәниятләрне, традицияләрне саклау һәм үстерү өчен” күкрәк билгесе белән бүләкләнде. Киләчәктә дә һөнәри уңышлар, сәламәтлек телибез.