Бүген Г.Камал исемендәге Сикертән төп мәктәбендә чираттагы әти-әниләр җыелышы уздырылды. Җыелышта район мәгариф идарәсе методисты Глазкова И.Б., психолог Гыйбадуллина А.И., җирлегебездәге участок инспекторы Кузьмин Д.В. катнашты. Мәгариф идарәсе методисты Глазкова И.Б. төп дәүләт имтиханы, имтихан тапшыру үзенчәлекләре мәсьәләләре турында аңлатып китте. Психолог Гыйбадуллина А.И. әти-әниләргә социаль челтәрләр, электрон тәмәке турында сөйләде, балалар белән аралашканда игътибарлы булырга дигән киңәшләр бирде. Җирлегебездәге участок инспекторы Кузьмин Д.В. гаиләдә үз-үзеңне тоту, җәмәгать урыннарында һәм массакүләм чараларда, урамда үз-үзеңне тоту кагыйдәләре, тәмәке тарту, сәбәпсез дәрес калдыру, законнар турында гына түгел, ә кылган хокук бозулар нинди нәтиҗәләргә китерүе турында да сөйләде. Җыелышның икенче өлешендә “Гаилә-ныклы терәгем” дигән темага укучылар бәйрәм концерты куйдылар.