21 нче февраль – һәр милләт, һәр халык өчен бәйрәм көн – Халыкара туган тел көне. Әлеге бәйрәм уңаеннан, безнең мәктәптә "Туган телеңне өйрән һәм ярат" районкүләм шигырь укучылар бәйгесе үтте. Бәйгедә гомуми белем оешмаларының укытучылары катнашты. Туган тел укытучылары белән бергә физика, математика, рус теле, инглиз теле, сәнгать, башлангыч сыйныф укытучылары, китапханәчеләр көч сынашты.
Бәйгенең максаты: укытучыларны татар шигъриятенә тарту, татар халкының мәдәнияте, милли үзенчәлекләре белән кызыксындыру, укытучыларны иҗатка тарту, эстетик зәвык формалаштыру иде.
Бәйгедә катнашучы 37 укытучы татар телендә татар шагыйрьләренең туган якка һәм туган телгә багышланган шигырьләрен тәкъдим иттеләр. Мәктәбебезнең татар теле һәм әдәбияты укытучылары З.Г.Шәфигуллина һәм Р.Д.Исмәгыйлева бәйгедә бик матур чыгыш ясадылар һәм призлы урынга лаек булдылар. Алар диплом һәм истәлекле бүләк белән бүләкләнделәр.