1941-1945 нче еллар тарих битләренә канлы хәрефләр белән уелган. Бөек Ватан сугышы. Аяусыз бәрелешләр, киселгән гомерләр, ятимнәрнең ачы күз яшьләре. 27 млн ватандашыбызның вакытсыз гомере өзелгән, күпмесе гарипләнеп кайткан, хәбәрсез югалган, ә күпме ир-егет фашист концлагерендә газапланган, үтерелгән. Шулар бәрабәренә Бөек Җиңү яуланган. Безнең ул көннәрне онытырга хакыбыз юк. 28 нче октябрь көнне мәктәбебездә “Мәңге сүнми торган хәтер” дип аталган кичә булды. Кичәдә Арча һәм Әтнә районнары буенча хәрби комиссариат җитәкчесе Борһанов Алмаз Әгъзамович, Кукмара агро көллияте каршында оешкан “Кар десанты” отряды вәкилләре, Арча районы хәрби ветераннар советы рәисе катнашты. Якташыбыз Кәримуллин Шәриф Кәлимовичның эзләнү барышында табылган шәхси әйберләре туганнарына тапшырылды.