70 ел элек халкыбыз, тиңдәшсез каһарманлык үрнәкләре күрсәтеп, кешелек дөньясына үлем белән янаган фашизмны тар-мар итүгә ирешә. Бу канлы көрәшнең кайтавазы әле бүген дә инде бик тә санаулы калган ветераннарыбызның сугыш уты көйдергән йөрәкләрендә әрни, тәннәрендә төзәлмәс яралар булып сыкрый.      Яу кырыннан исән-сау кайтып, бүгенге көндә безнең арадан киткән, тирән хөрмәткә, ихтирамга лаек ветераннарның да үткән гомер юллары героик дастанга, үлмәс җырга тиң. Шундый батыр сугышчыларның берсе - Зиннәтуллин Әсгать Зиннәтулла улы. 18 нче февраль көнне мәктәбебездә Әсгать абыйның балалары, оныклары белән очрашу кичәсе булып узды. Әсгать  абыйның архивтан  кайткан  документларына нигезләнеп,  аның чын  герой  икәнлегенә тагын  бер  кат  инандык. Ләкин ни кызганыч, аңа Советлар  Союзы  Герое  исеме бирелми  кала. Шулай да  ул  безнең  өчен - ГЕРОЙ. Кичәбезгә Арча һәм Әтнә районнары  хәрби  комиссары  Борһанов Алмаз Әгъзәм  улы, сугыш чорының барлык авырлыгын үз җилкәсендә татыган, әтиләренең сугыштан кайтуын гомер буе көтеп яшәгән сугыш чоры балалары, авыл җирлеге башлыгы Вәзир Сәгыйтов һәм авылдашлар килде. Кичә бик эчтәлекле, күңелнең иң нечкә кылларына үтәрлек булды.