Носы төп мәктәбендә Сәрдәбаш авылыннан укучылар белем ала. Бу авылның төп халкы – керәшен татарлары. 18 апрельдә Носы төп мәктәбендә “Керәшенем, карендәшем минем, халкымның бер асыл бизәге”  дип исемләнгән кичә узды. Кичәбезнең максаты: укучыларыбызны керәшен татарларының мәдәнияте, сәнгате белән таныштыру, укучылар арасында дуслыкны ныгыту.  Укучылар белән берлектә керәшен татарлары арасыннан чыккан язучылар, сәнгать әһелләре,  керәшен татарларының милли киемнәре, милли аш – сулары, бәйрәм – йолаларын яктырткан күргәзмә эшләп куйдык. Иртәдән мәктәп фойесында керәшен татарлары җырлары, “Бәрмәнчек”, “Айбагар” керәшен татарлары фольклор ансамбельләренең видеоязмалары яңгырап торды. Кичәбездә Таисия Алексеевна, Вера Васильевна гөсләдә уйнады. Укучыларыбыз арасында да гөсләдә уйнаучылар бар. 9 нчы сыйныф укучысы Степанова А. гөсләдә “Арча көен” башкарды. Сәрдәбаш клубы каршында оештырылган керәшен татарлары фольклор ансамбеле керәшен җырларыннан папурри, “Сигезле” уенын бүләк иттеләр. Тамашачылар кунагыбыз Венера Павловна башкаруындагы керәшен җырларын яратып тыңладылар.  Кичәне укучыларыбыз, бәйрәмгә килгән авылдашлар бик җылы кабул иттеләр.