Башлангыч сыйныф укучыларының язгы табигать турында күзаллауларын киңәйтү максатыннан 4 май  көнне табигатькә экскурсиягә чыктык. Май  – иң матур айларның берсе. Табигать яшәрә, яңа тормыш башлана. Күзләр нәни генә яшел яфракка да, беренче чәчәкләргә дә  сокланып, яратып карый. Май аенда табигатьтәге һәр үзгәреш кеше күңелен җилкетә, татлы уйларга этәрә.  Зәңгәр күктә язгы кояш елмая. Кояш иртәрәк карый торган яр буйларында, сап-сары тузганаклар  чыга. Аларның оя-оя булып утырулары күңелләрне нечкәртә. Йонлач сабакларына, матур чәчәкләренә карап сокланып торасың. Җир йокыдан уяна. Туган якларына кайткан  кошларның шат авазы яңгырый... Әлеге могҗизаларны үзең  күрү, язгы табигатьнең тавышларын үзең ишетү кирәк. Ә без күрдек, ишеттек...