Мәктәбебездә атнага ике тапкыр бию түгәрәге эшли. Дәресләр дүшәмбе  һәм чәршәмбе көннәрендә  дәресләр беткәч башлана.
Бию сәнгатьнең иң матур төрләренең берсе, кешенең яңа сыйфатларын ача. Бала чактан биеп үскән кеше зифа, төз, матур була. Бу түгәрәк укучыларның артистлык сәләтен, бию күнекмәләрен  үстерү максатыннан чыгып оештырыла. Шулай ук сәхнә серләренә төшенү, кулдан матур киемнәр әзерләү һәм зәвыклы киенү, тамашачылар алдында үз-үзеңне тотарга өйрәнү бурычларын үз эченә ала.Түгәрәктә сәләтле балалар белән күмәкләп, шулай ук индивидуаль эшләү дә урын алган. Чөнки мәктәбебездә сәнгать сөюче балалар бик күп, араларында биюгә оста кызлар-малайлар бар. Шундыйларны сайлап алып һәм теләк-хыялларын истә тотып эшләү уңышлы булыр дигән фикергә килдем. Шушы көннәрдә укучыларны, укытучыларны, тамашачыларны түгәрәк эшчәнлеге белән таныштыру, эшләнгән эшләргә нәтиҗә ясау максатыннан  бию  түгәрәгенең иҗади чыгышы булды. Түгәрәккә йөрүче укучылар яңа биюләрен тәгъдим иттеләр.