Тормышта һәр нәрсә дә кечкенә генә әйбердән башлана. Мәсәлән, бөртектән - икмәк, орлыктан - үсемлек, нурдан - кояш, ә белем - безнең беренче китабыбыз - Әлифбадан. Бүген Түбән Мәтәскә урта мәктәбендә 1 нче класс укучылары “Рәхмәт сиңа, Әлифба” дип аталган бәйрәм үткәрделәр. Бәйрәмдә укучыларның әти-әниләре, башлангыч класс укучылары, укытучылары, мәктәп администрациясе катнашты. Укучыларны класс җитәкчеләре Йосыпова Р.К. сәяхәткә алып чыгып китте. Алар төрле тукталышлар аша үтеп, үзләренең белемнәрен сынадылар, җырладылар, биеделәр, табышмаклар чиштеләр, әлифбаны ничек үзләштерүләрен күрсәттеләр. Әлифба, Азбука дәреслекләренә үзләренең рәхмәтләрен җиткерделәр, Математика дәреслегенең зирәклек өчен булган биремнәрен бик теләп үтәделәр. Укучылар бу дәреслекләргә алмашка килүче Әдәби уку, Татар теле дәреслекләрен кабул итеп, аларны саклап тотарга сүз бирделәр. Бәйрәмдә мәктәпнең укыту эшләре буенча директор урынбасары Гыйбадуллина З.Ш. укучыларны бәйрәм белән котлады, аларга уңышлар теләде. Соңыннан, укытучылары Йосыпова Р.К., укучыларга “Әлифбаны уңышлы тәмамлаучы” грамотасы тапшырды, үзенең теләкләрен җиткерде. Бәйрәм бик күңелле һәм җанлы үтте.