Бүген мәктәбебездә “Балаларга багышланган гомер” дип исемләнгән очрашу булып узды. Очрашуга кече күңелле, олы йөрәкле, беренче тапкыр нәни балаларны белем иленә алып керүче, хәреф танып укырга, язарга өйрәтүче мөгәллимә, ветеран укытучы – Павлова Әминә Миннегали кызын чакырдык. Әминә апа үзенең хатирәләре белән дә уртаклашты. Балачагы, мәктәптә укыган һәм укыткан вакытларын искә алды. Укучыларга матур теләкләрен җиткезде. 2 нче сыйныф укучылары үзләрен кызыксындырган сораулар да бирделәр, Әминә апаны котлап, шигырьләр сөйләделәр һәм җыр башкардылар. Әминә апага 70 яшь тулды. Аны шушы матур бәйрәме – юбилее  белән чын күңелдән котлыйбыз. Тагын шундый очрашулар насыйп булсын дигән теләкләрдә калабыз. Очрашуны китапханәче Мифтахетдинова Фирдания Ансар кызы һәм 2 нче сыйныф класс җитәкчесе Фатихова Сәрия Дамир кызы әзерләде.