Туган як табигатен саклау — һәркемнең бурычы. Балалар бакчасында да яшь буында әйләнә-тирәгә сакчыл караш тәрбияләү, табигатьне сакларга, яратырга өйрәтү бурычы тора. Шул уңайдан безнең Мөрәле балалар бакчасында «Батарейка тапшыр — керпенең гомерен сакла!» исемле экоакция старт алды. Акциягә юктан гына әлеге исем куелмаган — бер батарейка бер керпе яши ала торган территорияне авыр металлар белән зарарлый. Балаларга җирдә аунап яткан батарейканың экологиягә зур зыян салуы турында аңлатылды. Балалар әлеге акциядә бик теләп, кызыксынып катнашалар. Бүгенге көндә махсус савытыбызда 378 батарейка җыелды. Димәк, безнең нәниләребез табигатьне саклауга бик зур өлеш керткәннәр.