Әлеге матур көнне без үзенчәлекле үткәрергә уйлап, балалар өчен милли бәйрәмебез - САБАНТУЙ үткәрдек. Балалар  кичтән үк якыннары белән әзерләгән бирнәләре белән, күчтәнәчләре белән килделәр һәм озак та көттермичә зур бәйрәмебез башланып та китте. Әлеге бәйрәм балаларны халкыбызның гореф-гадәтләре белән тирәнтен таныштыру, үзара дуслашу һәм берләштерү, уеннар аша сөйләм телен үстерү, сәламәт яшәү рәвешен пропагандалау, милли спорт уеннарына кызыксыну уяту максатыннан оештырдык.  Заманча биюләр, САБАНТУЕНА багышланган җырлардан соң бәйрәмнең кульминацион өлешенә дә күчтек. Балалар матур итеп бизәлгән спорт мәйданчыгына уздылар һәм милли уеннарыбыз башланып та китте. Һәр төркем балалары "Су ташу", "Капчык сугышы", " Чүлмәк вату",  "Таяк тартышу", "Эстафета", "Аркан тарту" кебек уеннарда катнашып күңел ачтылар. Бәйрәмдә бер бала да бүләксез калмады, әти-әниләре һәм бакча хезмәткәрләре ярдәме белән тупланган бирнәләр сабантуй рухын тагы да күәтләп күңелләрне күтәрде. Музыка җитәкчесе,татар теле тәрбиячесе Һәм тәрбиячеләр тарафыннан оештырылган әлеге чара балалар күңелендә озак сакланыр дигән теләктә калабыз.