Арча- һөнәрчеләр ягы. Электән үк Арча яклары үзенең читекләре белән данлыклы. Чиккән читекләрнең даны Көнбатыш Европа илләренә кадәр барып җиткән.Ә хәзер Арча читекләре бөтен дөньяны гизә.
2022 нче ел-Россиядә “Халык сәнгате һәм мәдәни мирасны саклау” елы булып игълан ителде. Шул уңайдан, 23 нче апрельдә, мәктәбебездә 7нче, 9 нчы сыйныф укучылары катнашында, “Арча читекләре” дигән темага кичә үтте. Укучыларыбыз кичәдә Арча тарихы, халык сәнгате, мәдәни мирасы, гореф-гадәтләре турында сөйләделәр. Бу кичәгә «Арча милли киемнәре» оешмасында эшләп, хәзерге көндә лаеклы ялда булган хезмәт ветераны,чигү остасы- Фәридә Габделхаковна Каримуллина һәм безнең мәктәпне тәмамлап, күп еллар «Арча милли аяк киемнәре» оешмасында эшләгән, хәзерге вакытта Казан шәһәрендәге “Сәхтиян” оешмасында модельер булып эшләүче , милли аяк киемнәре өчен бизәкләр төшерүче-Әюпов Альберт Миңнур улы чакырылды.
Безнең кунакларыбыз укучыларыбызны тормыш һәм хезмәт юллары, үзләренең эшчәнлекләре белән таныштырдылар.Мастер класс та күрсәттеләр. Кичәдә укучыларыбыз Арча читекләре турында шигырьләр сөйләделәр, җырлар җырладылар, биюләр һәм гармунда татар халык көйләре башкардылар. Кичә бик күңелле үтте.
Бүгенге көндә читек серләрен белүчеләребез олыгаеп бара, ә бу кәсепне югалтырга ярамый. Безнең арабызда милли җанлы кешеләребез булганда милли киемнәребез юкка чыкмас. Үзебездәге татарларга, милләтебезгә кирәк! Аяк киеме буларак кына түгел, һөнәр буларак, күңел бизәкләре, халык җәүһәрләре буларак кирәк!