Мәктәптә беренче яртыеллык нәтиҗәләре буенча ата-аналар җыелышлары бара. Бүген 8 - 9 класс ата-аналар җыелышы булды. Әти-әниләре укучыларның өлгереше, алда торган имтиханнар турында киңәштеләр.

11 класс укучысы Сафин Рузил региональ олимпиадаларның муниципаль турында  рус теленнән 1 урынны яулаган иде. Бүгенге көндә ул республика турына әзерләнә. Уңышлар сиңа, Рузил!

7 класс укучысы Нотфуллина Роза "Борынгы Болгарлар" дигән район рәсем конкурсында өченче урын яулады. Котлыйбыз, Роза!

Бүген  “Яңа  технологияләрне куллану – уку сыйфатын күтәрүче фактор” дигән темага  педсовет утырышы булды. Анда мәктәп укытучылары коллективы, Тәүгелде башлангыч мәктәбе укытучылары, Бакырчы һәм Тәүгелде  балалар бакчалары тәрбиячеләре катнашты.  

Бүген безнең мәктәптә гөрләп Чыршы бәйрәмнәре үтте.  Бәйрәмне мәктәп директоры Кәримуллин И.Н. ачып җибәрде. Ул укучыларны,  әти-әниләрне бәйрәм белән котлады, үткән елдагы уңышларыбыз белән таныштырды, укуда һәм төрле конкурсларда югары нәтиҗәләргә ирешкән укучыларга бүләкләр тапшырды. Беренче сменада 1- 7 класс укучылары бәйрәм итте. Укучылар җырладылар, биеделәр, шигырьләр сөйләделәр. Соңыннан лоторея уеннары уйнатылды. 

Икенче сменада "Яңа ел" бәйрәмен 8- 11 класс укучылары оештырды. Һәр класс төрле илләрдә Яңа ел бәйрәмен алып килгән. Мәсәлән, 8 класс -  Испания, 9 класслар - Италия, 10 класс - Һиндстан, 11 класс укучылары Япониядәге бәйрәм күренешләрен күрсәттеләр. Бу илләрдәге гореф-гадәтләр, аларның уеннары, биюләре белән таныштырдылар. Бәйрәм кичәсе дискотека белән тәмамланды.

Яңа ел бәйрәме уңаеннан рәсем конкурсы игълан ителде. укучылар конкурста бик теләп катнашты. Барысы 17 рәсем конкурска чыгарылды. Яңа ел бәйрәме көнне конкурска йомгак ясалачак.

Мәктәптә икенче ел инде "Мастерилка" түгәрәге эшли. Технология укытучысы Вафина Р.М. җитәкләгән бу түгәрәктә укучылар төрле кул эшләренә өйрәнәләр. укучылар тарафыннан эшләнгән йомшак уенчыклар, пластилиннан панно, атлас лентадан сувенирлар һ.б. - кемгә генә бүләк итсәң дә, затлы буләк. Бу уку елында кызлар челтәр энэсе белән шәлләр, кофталар, болеролар  бәйли башладылар.