27 апрель көнне мәктәбебез музеенда Бөек Ватан сугышында Җиңүгә 77 ел тулу уңаеннан зур чара – укучылар конференциясе булып узды. Биредә 7а һәм 7б сыйныфы укучылары катнашты. Уку йортыбызда ел дәвамында мәктәп тарихы музее эшләп килә. 7 а сыйныфы укучылары – әлге түгәрәк әгъзалары. Алар музей эшен бик яратып, зур кызыксыну белән башкаралар. Биредә сакланучы экспонатларга карата да үзләрендә сакчыл мөнәсәбәт тәрбияләделәр. 

    Конференция барышында Бөек Ватан сугышы елларындагы авыл тормышы, мәктәбебез узган авырлыклар, Бөек Ватан сугышында катнашкан укытучыларыбыз М.К.Таһиров, З.З.Закиров, Г.Х.Раскулов, Ф.К.Каюмовлар турында мәгълүматлар тыңланды. Укучыларда бигрәк тә сугыш чорындагы мәктәп тормышы зур кызыксыну уятты. Сугыш чорында укыган, мәктәптә эшләгән укытучыларның фидакарь хезмәтләренә сокланмаслык та түгел шул. Ягылмаган салкын мәктәпләрдә ачлы-туклы балаларга белем бирү, әле җитмәсә, аларны уку кирәк-яклары белән тәэмин итү дә укытучылар өстенә төшкән авырлыклардан. Шулай ук легендар директорларыбыз М.К.Таһиров, Ф.К.Каюмовларның томыш юллары да зур хөрмәт уятты укучыларда.

      Мәктәбебездә сугыш чорына караган бик күп кызыклы мәгълүматлар саклана. Альбом-папкалар, укытучыларыбызның шәхси гаилә архивларыннан алынган фоторәсемнәр, документ күчермәләре – болар барысы да зур байлыкка тиң. Мәктәбебез тормышына багышланган альбомнарыбызда, хәтта, фронттан килгән хат та бар. Вакыт узган саен бу экспонатлар үз бәяләрен җуймыйлар, ә кыйммәтләнә генә баралар.

     Куркыныч сугышлар башка кабатланмасын, сугыш китергән афәтләр турында китаплардан укып, музейларда гына күреп белергә язсын иде. Мәңгелек дан, сугыш каһарманнарына!

Нуриева Гөлназ Хамис кызы,

туган тел һәм әдәбият укытучысы,

Мәктәп тарихы музее җитәкчесе.