3 декабрь көнне балалар бакчасында  шәһәребезнең күркәм мәчетенең имам-хатыйбы белән очрашу булып узды. Коронавирус эпидемиясе уңаеннан чакырылган кешеләр саны минимумга җиткерелде.Чара  мәктәпкә әзерлек төркеме балаларының сәламләү чыгышы белән башланып китте. Балалар биеделәр, җырладылар, шигырьләр сөйләделәр. Очрашу дустанә мөнәсәбәттә бик күңелле, узды. Тыңлаучылар үзләрен кызыксындырган сорауларын бирделәр. Имам хәзрәт аларга бик теләп җавап бирде.  Рәзиф хәзрәт, бигрәк тә, балаларны тәрбияләү авыр хезмәт дип билгеләп үтте. 
    Милли тәрбия мәсьәләләре дә күтәрелде. Чарада катнашучылар һәм хәзрәт балалар тәрбияләү һәм белем бирү -  балалар бакчасы һәм ата-аналарның уртак тырышлыгы  дигән фикергә килделәр. 
Һәр милләт үзенең тарихын белергә, үз халкының гореф-гадәтләрен хөрмәт итәргә һәм балаларны алар рухында тәрбияләргә тиеш. Очрашуда педагог Миназева Алия Ринат кызы чыгыш ясады. Ул балалар бакчасында милли тәрбия буенча төрле эшләр  алып барылуы турында сөйләде. Очрашу ахырында педагог Насертдинова Лилия Минегат кызы милли баш киемнәрннән түбәтәй ясау буенча мастер-класс үткәрде. Кунаклар һәм хуҗалар очрашудан канәгать калдылар, үз эшләрен дәвам итәргә вәгъдә бирделәр. 

Очрашуны педагог Хәмидуллина Илсөяр Иншатовна алып барды.