Юнармейцы нашей школы присоединились к акции "Письмо солдату".Они написали письма нашим землякам,которые находятся в СВО

Бөтен гомере буе халкына фидакарьләрчә хезмәт кылган, милләт мәнфәгатен үзенең яшәү кыйбласы иткән татар галимнәре һәм әдипләре шактый күп: Утыз Имәни, Шиһабеддин Мәрҗани, Риза Фәхреддин, Гаяз Исхакый, Габдулла Тукай, Галимҗан Ибраһимов, Мәҗит Гафури һ. б. Болар арасында иң мөхтәрәм урыннарның берсен Каюм Насыйри, гасыр башындагыча әйткәндә, Каюм баба алып тора. 77 яшендә вафат булган бу игелекле зат ярты гасырдан артык, алны-ялны белмичә, милләткә хезмәт итә. Ул дауламый да, шауламый да, дәгъвалар да куймый, бәхәс-конфликтка да керми,—халыкның нәкъ үзе кебек,—меңәрләгән кы­енлыкларны сабыр гына, тавышсыз-тынсыз гына җиңә-җиңә эшли дә эшли, эшли дә эшли. Аның өчен байлык та, дан-шөһрәт тә мөһим түгел. Каюм бабаны тырышлыгы белән мәсәлләргә кергән кырмыска белән чагыштырырга мөмкин бу­лыр иде. Әмма кырмыска кышын ял итә, үз «җыйганын» үзе ашый. Каюм бабаның исә җәе генә түгел, кышы да урак өсте кебек. Аның «җыйганы», аның хезмәт җимеше, - барыннан да элек, башкалар өчен, милләтнең киләчәге өчен. Үз хезмәтләре­нең иртәме-соңмы халыкка файда китерәчәген К. Насыйри үзе дә искәртә. «Моннан соңгылар,—ди ул,—әлбәттә, файдаланырлар. Халык та күнегер, тыныч булыр. Әмма һәрбер нәрсәне әүвәл башта уйлап тапкан, гамәлгә ашырган адәмнәр халыкның тиргәвеннән башка нәрсә хасил итмиләр... Колумб, Гутенберг¹ һәм башкаларның кыйссасы моңа билгеле мисалдыр».

         Каюм Насыйри соңгы көннәренә кадәр укуын һәм язуын ташламый. «Үзегез карт, күзләрегез зәгыйфь булса да, язуыгызны дәвам итәсез икән», - дигән кешегә ул: «Алла мине язар өчен яраткан, бу көннән язмый утыру аның хөкеменә каршылык булыр дип куркам», - дип җавап бирә торган була.

         Алпар урта гомумбелем мәктәбе укучылары бүген К.Насыйриның тууына 200 ел тулу уңаеннан үткәрелгән виртуаль экскурсиядә олуг шәхесебез турында менә шундый бай мәгълүмат тупладылар, аның яңа гына табадан төшкән “Китаб-әт-тәрбия” китабындагы бүгенге көн өчен дә бик әһәмиятле булган үгет- нәсихәтләре белән таныштылар. Әлеге кичә укучыларда К.Насыйриның тормышы, бай иҗади хезмәте белән зур кызыксыну һәм әлеге бөек шәхесебез белән горурлану хисләре уятты.