Бу кайчак була?

        Кырлар буш кала,

        Яңгырлар ява

        Бу кайсы вакыт,

        Я, әйтеп кара?

     Календарьда көзнең соңгы ае. Кырларда, бакчаларда эшләр тәмамланды. Кешеләр мул уңышка шатланып кыш килгәнне көтә. Ял итеп, бәйрәм ясап алыр өчен менә дигән вакыт. Елның бу фасылында бәйрәм итәр өчен “Сөмбелә” иң яхшы бәйрәм. Сөмбелә бәйрәме элек-электән уңыш бәйрәме, уен-көлкегә, җыр-биюгә бай бәйрәм буларак үткәрелгән. Әлеге бәйрәмдә көз турында җырлар җырланып, шигырьләр сөйләнгән, җитезлектә, тапкырлыкта көч сынашканнар. Шуңа күрә без дә бәйрәм итәргә дип укучылар белән “Сөмбелә” бәйрәменә җыелдык.

   Бәйрәмгә укучылар бик тырышып әзерләнделәр: бик күп шигырьләр, җырлар, биюләр өйрәнеп көз кызы Сөмбеләнең бүләкләрен алдылар.

   Бәйрәм кунакларсыз үтми. Безнең бәйрәмгә дә кунаклар килде. Кунакка дип килгән яшелчәләр балалар өчен төрле табышмаклар, көз турында сынамышлар алып килгәннәр иде, ә бәйрәмнең төп кунагы Сөмбелә балаларны төрле уеннар уйнатып көчләрен сынады, татар телендә җыр җырлау, шигырь сөйләү осталыкларын тикшерде.

    Бәйрәмнәр балаларны берләштерә, үзара аралашырга һәм дус булырга өйрәтә. Ә бәйрәмнәрне татар телендә үткәрү телне өйрәнергә, татар сәнгате һәм мәдәниятенә карата кызыксыну уятырга ярдәм итә. Сөмбелә бәйрәме МИН  ТАТАРЧА СӨЙЛӘШӘМ дигән сүзләр белән тәмамланды. Әйе, без татар телен яратып өйрәнәбез, татарча сөйләшәбез. Укучылар өчен шундый күңелле бәйрәм оештырган өчен Ләйсән Рәфкать кызы Сөнгатуллинага зур рәхмәтебезне белдерәбез.