Керәшеннәрнең буыннан-буынга тапшырырлык матур бәйрәмнәре бик күп. Шуларның берсе ─ Нардуган бәйрәме.

Керәшеннәр Яңа ел бәйрәмен Нардуган дип атаганнар. «Нар» кояш дигәнне аңлата. Нар туган, икенче төрле әйткәндә, яңа ел башланган дигән сүз. Бәйрәм барышында төрле уеннар оештырылган. Бәйрәмнең төп мизгелләре: кеше танымаслык итеп киенеп йорттан йортка кереп йөрү. махсус җырлар башкару, кунак булу; йөзек салып багу, кызларның язмышын билгеләү, кияү булачак кеше турында төрлечә багулар үткәрү.Битләрен каплаган егетләр, кызлар уеннар оештырганнар һәм бер-берсен күзләгәннәр. Кайбер кешеләр, төрлечә киенеп, үзләрен танытмыйча, урамнарда такмаклар әйтеп, халыкның күңелен ачып, көлдереп йөргәннәр.Аларны "шамакайлар" дип йөрткәннәр. Шамакайлар кулларына мич капкачы, табалар тотканнар, аларны бер-берсенә сугып, төрле тавышлар чыгарганнар, кыңгыраулар шалтыратканнар, ягъни куркыныч көчләрне (җеннәрне) куганнар.

Бу матур бәйрәм безнең авылыбызда бүгенге көнгәчә сакланып калган. Нардуган бәйрәмен йомгаклап, 18 гыйнвар көнне безнең мәктәп укучыларыда клуб бинасында Нардуган бәйрәмендә чыгыш ясадылар.

Хуш киләсең, Нардуган!

Май бирәм, күмәч, калач.

Бәйрәм көнендә

шатланышып,

Рәхәтләнеп күңел ач!

Нардуганым нур булсын,

Ризыклары мул булсын!

Нардуган ашы кемгә тия,

Шул бик бәхетле булсын!