23 октябрь көнне Чакмагушта башлангыч сыйныф укытучылары өчен «Деятельность образовательных учреждений с. Чекмагуш в режиме реализации национального проекта «Современная школа» темасы астында семинар-практикум узды. Безнең мәктәптән 1 сыйныф укытучысы - Салахова Сөрия Рөстәм кызы, 2,4 нче сыйныф укытучысы Муллахметова Альфира Флүр кызы катнашты.

Яшь буынның сәламәтлеген ныгыту бүгенге көндә иң мөһим факторларның берсе. 23 нче октябрь көнне Уразай авылы мәдәният йортында авыл советы һәм мәдәният хезмәткәрләре тарафыннан "Спорт зарарлы гадәтләргә каршы" исеме астында, сәламәт яшәү рәвешен пропагандалау йөзеннән, мәктәп укучылары белән берлектә, бик күңелле чара узды. Укучылар шахмат, теннис, аэрохоккей спорт төрләре буенча үзара ярыштылар. Ярыш бик "кызу"  барды. Чара ахырында һәр спорт төре буенча да 1-3 урыннар билгеләнде, грамоталар һәм бүләкләр тапшырылды. Балалар үзләренең осталыкларын күрсәттеләр, шулай ук күтәренке кәеф һәм уңай эмоция алдылар. 

«Җәлил укулары» II Халыкара әдәби бәйгесенең мәктәп туры тәмамланды. Әлеге бәйгенең район турында мәктәп данын якларга "Җәлил татар телендә" номинациясендә 9 нчы сыйныф укучысы Шәрипова Ләйлә, "Җәлил рус телендә" номинациясендә ике яшь категориясендә 7 нче сыйныф укучылары Гиздатуллина Илзирә, Маликова Азалия, 9 нчы сыйныфтан Шайдавлетова Язилә яклыйчаклар. Кызларга уңышлар телибез

20 октябрь көнне "Бүләк" өстәмә белем бирү үзәгендә Татарстан Республикасы олимпиада үзәге оештырган "Литературный марафон" узды. Әлеге чарада безнең мәктәптән Маликова А., Гиздатуллина И. үз белемнәрен сынап карадылар.

"Татарча диктант" — татар телендә хатасыз язарга өйрәтү, әдәби татар телен кулланучыларның даирәсен арттыру, орфографик һәм грамматик хаталарны тикшерү максатыннан оештырылган "Татарча диктант" Бөтендөнья белем бирү акциясендә безнең мәктәп тә актив катнашты. Әлеге күңелле вакыйгада укучылар, мәктәп коллективы, ата-аналар бик теләп үз көчләрен сынап карарга булдылар һәм бик уңышлы гына башкарып чыктылар.

18 октябрь көнне Актанышның үзәгендә урнашкан аерым фәннәрне тирәнтен үзләштерүле икенче санлы  мәктәбендә гамәлләштерелгән төбәкара семинарның чираттагысы башлангыч сыйныф укытучылары өчен оештырылып, аның эшендә район педагоглары белән беррәттән Мөслим, Минзәлә, Сарман районы, Башкортстанның Чакмагыш, Илеш районнары мөгаллимнәре дә катнашты. Әлеге семинарда безнең мәктәптән Шәрипова Алсу Флүр кызы катнашты. Төрле төбәкләрдән килгән 70кә якын укытучы бүген үзләрнең белем “багаж”ларын тулыландырды: ачык дәрес, мастер-класслар карады.

18 нче октябрь көнне укучылар арасында мәктәп ярминкәсе узды. Әлеге ярминкәгә укучылар үзләре эшләгән кул эшләнмәләре, пешкән ризыклар алып килделәр.

Традицион рәвештә уздырыла торган Сөмбелә бәйрәме бу елны да гөрләп узды. Бу чараны 9 нчы сыйныф укучылары бик нык эчтәлекле итеп үткәрделәр. Бәйрәм көз тематикасындагы уеннар, бәйгеләр белән үрелеп барды. Әлеге күңелле чара бәйрәм табыны янында дәвам итте.

16 октябрь - Бөтендөнья азык-төлек көне уңаеннан, башлангыч сыйныф укучылары белән "Без ничек тукланабыз?" темасына сыйныф сәгате уздырылды. Дөрес туклану, файдалы ризыклар турында мәгълүматлар алдылар.