Соңгы кыңгырау бәйрәме Авыр да, үзгә дә булган соңгы кыңгырау бәйрәме безне озын җәйге каникулларга озата. Өч чирек буена, умарта күчедәй, шаулап торган мәктәп соңгы чиректә сагышлы тынлыкка чумды: укулар читтән торып башкарылды. Дүртенче чирек мәгариф системасында укыту эшчәнлеге дистанцион формада булуы белән тарихка кереп кала. Дөнья күләмендә таралган афәт уку-укытуны туктата алмады. Киресенчә, укучы, укытучы, ата-ана эшчәнлегенең нигезен ныгытты. Укуның кирәклеген, гаиләнең бердәмлеген, кешеләр арасында бары тик дустанә мөнәсәбәт урнашырга тиешлеген, мәктәпнең икенче туган йорт вазифасында булуын аңлаган хәлдә уку елын тәмамлыйбыз. Уку нәтиҗәләребез сөендерә: 3 отличник, 18 ударник 61 % сыйфатны бирә. Өлгермәүчеләребез юк. Муниципаль фән олимпиадаларында 7 җиңүче һәм призерларыбыз булды. “Сириус” дистанцион олимпиадаларында да уңышларыбыз бар. Төрле конкурслар һәм спорт ярышларында укучыларыбыз җиңүләр яулады. Ә чыгарылыш класс укучылары гадәти булмаган шартларда мәктәп белән саубуллаша. Канат ныгыткан, шәхес булып формалашуга юнәлеш биргән белем йорты, әлбәттә, якты истәлек булып, күңелләрендә сакланыр. Ак юл сезгә, 9 нчы класс укучылары! Барыгызны да Соңгы кыңгырау бәйрәме белән тәбриклибез! Сәламәт, аек акыллы, ватан җанлы булыгыз. Киләсе уку елында, сезнең шат авазлар астында, укулар башлансын иде дигән теләктә калабыз.