Бүген безнең мәктәптә «Көзге уңыш» дип исемләнгән искиткеч матур бәйрәм һәм ярминкә гөрләп узды. Кояшлы, аяз көн табигатьнең алтын төсләренә коенган мәктәп ишегалдын тагын да ямьләндереп, күңелләребезгә бәйрәм рухы өстәде.

Укучыларның дәртле чыгышлары, төрледән-төрле кул эшләре, көз байлыгы — мулдан тезелгән өстәлләр һәркемнең күңеленә хуш килде. Әмма бүгенге матурлыкның иң зур сере — ул сезнең, кадерле әти-әниләребезнең, зур тырышлыгы!

Сез пешереп җибәргән тәм-томнар — кайнар коймаклар, кабарып торган бәлешләр, баллы пироглар һәм башка нигъмәтләр ярминкәнең бизәге булды. Сезнең һәр ризыкта гаилә җылысы, ана назы һәм аталарча кайгырту чагыла. Балаларыбызга шундый игътибарлы, ярдәмчел һәм актив булганыгыз өчен мең-мең рәхмәт! Сезнең кебек тату, бердәм коллектив белән генә мондый күркәм чараларны үткәреп була.

Бәйрәм истәлеге булып барыбызда якты хисләр, елмаюлар һәм мул табыннан фоторәсемнәр калды.

Тагын бер кат барчагызга да олы рәхмәтебезне белдерәбез! Сау-сәламәт булыгыз, гаиләләрегездә иминлек һәм муллык хөкем сөрсен!