21 нче февраль – Халыкара туган тел көне. 1999 нчы елда 21 февраль Бангладеш тәкъдиме белән  ЮНЕСКО тарафыннан Халыкара туган тел көне дип игълан ителә. Фәнис абый Яруллин: “Тел - халык күңеленең кыңгыравы.  Ә кыңгырау кагылмасаң чыңламый”-, дип дөрес әйткән бит. Мәктәбебез күңел кыңгыравын көн саен чыңлату үзәге булып тора. Ә Туган тел көне – безнең өчен икеләтә бәйрәм. Шуңа да бүген иртәдән үк мәктәбебез туган тел моңнарына күмелгән иде.  Дәрескә ашыгучыларны, тәнәфесләрдә укучылары “Татарлар килә” һәм “Туган тел” җырлары белән каршы алды.  Танылган шәхесләребезнең туган тел турында әйткән фикерләре кабинет ишекләренә, стендларга беркетелгән иде: “Туган телгә җан өрәсе иде...” (Факил Сафин), “Татармын мин, димә, газиз балаң, бөек  Тукай телен онытса” (Шәмсия Җиһангирова) һ.б.  Алар көн дәвамында телебезнең үткәне, бүгенгесе һәм киләчәге турында уйланырга җирлек бирде. Беренче, икенче тәнәфесләрдә беренче этажда “Ачык микрофон” чарасы үтте. Башлангыч сыйныф укучылары туган тел турында шигырьләр сөйләде. Туган тел дигән күңел кыңгыравыбыз мәңге чыңласын иде дигән теләктә калабыз.